101. හොඳ පල නො දෙන වස්තුව
1001. සපයා තබා දන - ඉන් පලු නොලද දු දනට
මරණින් පසුව තම - කවර පලයක් ලබනු හැකිවෙද ?
1002. දනයම නිසා හැම - දැය ඇති වෙතැයි සිතවන
මෝහය පහත් මෙන් - නීච ඉපදීමකට තුඩු දෙයි.
1003. යසස නො කැමතිවූ - දන සැපයුමට කෑදර
අනුවණ දද දනෝ - උපන් මහ පොළවටත් බරවෙත්.
1004. ලෝ දන තමන් වෙත - පිය නො කරනු ලැබී නම්
මරණින් පසු තමා - කුමක් ඉතිරිද ? යනු සිතනු මැත.
1005. එක් රැස් කළ දනය - කෝටි ගණනින් තිබුණත්
දීමත් කෑම දෙක - නොමැති දද දන දිළින්දන් මෙනි.
1006. නො වළදන තිබුණත් - උපකාරයක් නො කරන
සොබා ගති ඇත්තහු - දනය දන නොව මහා දුකකි.
1007. අ සරණ දිළිඳුනට - සරණක් නො මැත්තහු දන
තනිවම නාකිවන - ඉතා හොඳ කුල.ගනක සමවෙයි.
1008. පිය කරනු නො ලබන - කිසිවකු විසින් කිසිවිට
දනය ගම මැද වන් - විස රුකෙක විස පල දැරීමයි.
1009. වැය නො කළ පිනකට - සැපයූ දනය අදමින්
තමාවුව නො රැකී - පැහැර ගෙන යෙත් අනුන් සතුවේ.
1010. සුළුවුව දිළිඳු කම - යහපත් දනවතුන්ගේ
වැසි නැතිවීම මෙන් - පෙනේ පාඩුව දැනේ හැමටම.
102. ලජ්ජාව (හිරිය)
1011. පහත් වැඩ කෙරුමට - පිළිකුල් ගතිය හිරියයි
කුල කතුනගෙ හිරිය - වෙනස් වෙයි විමසා බලනවිට.
1012. ආහාරය ඇඳුම් - ආදී වෙනත් හැම දේ
හැම දෙනටම පොදු ය - හිරිය ඇති බව මිනිස් වෙසෙසයි.
1013. ආහාරය නිසා - ජීවිත රකිති ඇම දෙන
උසස් බව ගැනුනේ - උදක් හිරියම නිසා විය හැක.
1014. හිරිය සාදුනට - අබරණ නො වෙද හැමවිට
ඒ ගුණය නැත්නම් - ඔවුන් පැවතුම දුකක් නොමවෙද ?
1015. අනුනට එන නිගා - තමනට වන් දැයක් මෙන්
සිතන සුදනන් වෙත - සදා නො නැසී හිරිය නවතී.
1016. හිරිය රැකගනු මිස - දැනුමැති උගත් උතුමෝ
රැඳි ගුණය නොතකා - ලොවම අල්ලා ගන්ට නො සිතත්.
1017. දිවි පැවතුම් පිණිස - ඇත්තෝ හිරිය නො සිඳිත්
හිරිය රැකගනු වස් - දිවිය තොර කර ගනිති සමහරු.
1018. අනුන් කළ ලැජ්ජා - සහගත කිරිය තමනුත්
අනුමත කරයි නම් - ඔවුන් සතු දම් හැර ගියා වේ.
1019. ගති ගුණ නරක නම් - පරපුර දැවෙන පරිදී
හිරිය නැති දද දන - වෙනින් යහගති ඇතත් වැනසේ.
1020. හිරිය සිත නොමැතී - දුදනගේ නිති පැවතුම
ලී රූකඩ බබා - බැඳුන ලනුවෙන් සෙලවීම වැනි.
103. පවුල් රකින විදිය
1021. පවුල පිළිබඳ හැම - කටයුතු නො කඩ කළහොත්
එයට වැඩි උත්තම - උසස් බවකුත් නො මැතිවනු ඇත.
1022. නැණෙන් සහ දිරියෙන් - ඇතිවෙන කිරිය ඔස්සේ
තම පවුල පරපුර - නැගී මැනවින් දියුණ පැමිණේ.
1023. යහතින් තම පවුල - රකී මැයි සිතන කෙනකුන්
අබියසැ කර්මයා - මඩිය තදකර ඉදිරිපත් වේ.
1024. නො පමාව තරයේ - දියුණුව පිණිස පවුලේ
කරණ හැම කටයුතු - ඉබේ පරිපූරණව සිදු වේ.
1025. නිවැරදි දිවියකින් - තම පවුල රැකගත් දන
නෑ සියන් පරිදී - තමා වටකර ගතිත් ලෝ දන.
1026. හොඳ වීර බව වෙයි - කෙනකුට නියම වයසෙදි
ජනිත තම පවුලේ - කරන පාලනය නිවැරදි ලෙස.
1027. යුද පිටියෙහි නි බය - රණසුර සෙබළකු මෙන්
නෑ සියන් අතරත් - රකින බලවතුනට ම බර වේ.
1028. පවුල් රක්නනා ගිහි - දනහට මෝසමක් නැත
පුහු මානය අලස - තාවයෙන් තම පවුල වැනසේ.
1029. අඩු පාඩු පවුලේ - සිඳලනු පිණිස වෙහෙසෙන
සිරුර සුදනන් සතු - දුකට බඳුනක් වේවි හැමදා.
1030. දුක නමැති පොරවෙන් - පවුලේ මුල් සිඳෙන විට
උපකාරය පිණිස - යමෙක් නැත්නම් පවුල වැනසේ.
104. ගොවිතැන
1031. කවර රැකියක් කල - ලොව නගුල පසු පස යෙයි
එබැවින් වෙහෙසුන ද - ලෙව්හි ගොවිතැන උතූම් රැකියයි.
1032. ලොව නැමති සකෙහි - කඩ ඇණය වෙති ගොවියෝ
ගොවිතැන නො කළ දන - සා දුකින් අත පාන්නෝ වෙති.
1033. ගොවිතැනින් ජීවිත - ගෙවන අය ජීවත් වෙත්
හැම දන ම අනිකූත් - අනුන් පසු පස යදින්නෝ වෙති.
1034. ගොවිතැන සරු සාර - තම නිරිඳු සේසත යට
වෙනත් රජ දරුවන් - ඇවිත් සිටි සැටි දකිති ගොවියෝ.
1035. සී සා කන සොබා - ඇත්තෝ කෑම නො යදිති
ඉල්ලන දනන් හට - නො සඟවා දෙති යමක් ඇත්නම්.
1036. අලස වුව ගොවි යෝ - සිත දුරුකරන ආසා
තවුසනට තැන නැත - සු පේශල සිල් පවා නො රැකේ.
1037. සී සා සියුම් පස - හොඳහැටි වියල වී නම්
මිට කූදු පොහොර නැති - නමුත් හොඳ අස්වැන්න ගෙනදේ.
1038. සී සෑමට වඩා - යෙදුමත් පොහොර හොඳ වෙයි
වල් නෙලුමෙන් දෙවනු - වතූර බැඳ රැකූමයි ඉතා හොඳ.
1039. අයිතිකරු ගොවියා - ගොවි පලට නො ගියේ නම්
කිපුණු බිරියක් මෙන් - නො සතූටෙන් අස්වනු අඩුව දේ.
1040. නැතැයි යන අලස වූ - යදි දන දුටුව මිහි කත
සිනාසෙයි ඔහු හට - සදා අත පාන බව දක්නා.
105.
දුගීබව
1041. අමිහිරි වන දෙයක් - දුගී බව හැර වෙන නැත
දුකට උපමාවට - දෙයක් ලොව නැත දුගී බව මිස.
1042. දුගී බව නමැති - පාපෙන් වෙලුන දනහට
මෙලොවත් එලොව දෙක - සැපක් නැත දුක විනා කවදත්.
1043. කූල පරපුර සමග - රූ සපුව දෙක එකවර
දුගී බව නම් වූ - නැගෙන ආසා කමින් වැනසෙයි.
1044. උසස් අය වෙත වුව - පාපී දුගී තාවය
තූඩු දෙන නිගාවට - කතාවන් උපදවන වරදකි.
1045. දුගී බව නම්වූ - ඒ සා කම් කටුල්ලට
බලවත් නොයෙක් දුක් - එකතූවෙත් මැ යි නිරායාසෙන්.
1046. පැහැදිලි හොඳ අරුත් - ඇති සැටි දැනී කීවත්
දුගියන්ගේ වදන් - වැරදි ලෙස පිළිගනිත් ලෝ දන.
1047. එකඟ නැති දහමට - දුගී බව කෙබඳුද ලොව
බිහිකළ මව පවා - ඉවත බලමින් කෙරේ පිළිකූල්.
1048 ඊයේ වූ පමණ - කරදර ගැහැට හිරිහැර
අදත් දුක් දේවි ද - දුගී බව වූ නපුරු සපැමිණ.
1049. නිදත හැක ගින්නෙහි - එ නමුදු කිසිම විදියක
දුගී් බව ගින්නේ - නිදන්නට හැකි කමක් නොමැතියි.
1050. කන්නට කෑම නැති - අය මුළුමනින් ආසා
දුරු නොකිරීම ඇයි - ලුණුත් කාඩිත් නසන යමයා.
106.
හිඟමන
1051. සුදුස්සන් දුටු තැන - සිගමන් යැදිය යුතු වේ
සැඟවීම ඔවුනට - විනා තමහට නිගා නො ම වේ.
1052. දුක නැතිව ඉල්ලූ - දැය ලැබේ නම් සිඟමන
ඉල්ලන යදි දනට - මෙලොව ඒ හැර සැපක් නැත වෙන.
1053. නො සඟවන ගුණයත් - දීමෙහි ඇති යුතුකමත්
දත්තවුන් අබියස - සිඟීමත් ලස්සණය ගෙණ දෙයි.
1054. සිහිනෙන් පමණවත් - සඟවාලීම හුරු නැති
සුදනන්ගෙන් සිඟා - යැදුම දීමක් හා සමානයි.
1055. නො සඟවන සත් දන - ලොව ඇති නිසා විය යුතු
ගෙ දොරට සිඟා ගොස් - නො ඉල්ලා බලා ගෙන සිටුනේ.
1056. ගති ඇති නො සඟවන - සුදනන් දුටුව කෙණෙහී
සිඟන දන සිත දුක් - මුළුමණින් එකවරම නැති වේ.
1057. නින්දා අපහාස - නො කරම දුටුව දෙන දන
සිඟන දුක නැති වී - සොම්නසින් හද ඉපිල යාවි.
1058. නො මැති සඳ ලෙව්හී - යදි දන සිඟා වඩනා
ලො වැසි හැම දෙනා - තැනුව රූකඩ පරිදි හැසිරෙත්.
1059. දන් දීමට කැමති - දන් දෙන ඇත්තවුන්හට
සිඟන දන නැති නම් - කෙසේ යස ඉසුරු ඇති වේවි ද?
1060. යදි දන කිසි විටෙක - කෝපය නො ගත යුතු වෙයි
තම දිළිඳුතාවය - සැබෑ නිදසුනි එබඳු ගුණයට.
107. හිඟමනට බිය
1061. නො සඟවා දන් දෙන - කුඵණෙන් හෙබියවුන්ගෙන්
වුව සිඟමන නො ගනු - කෝටියකටත් වඩා අනගියි.
1062. ආහාර හිඟ වී - සිඟා කෑමෙන් ජීවිත
ගෙවනට වුනා නම් - ලෝක පාලකයා නැසේවා.
1063. කම් කටුලු කරදර - සිගීමෙන් නැති කර මැයි
යන සිතුවිලි පමණ - වෙනත් සිතුවිලි නො මැත තදබව.
1064. දිළිඳු වූ විටදිත් - සිගමන් කෑම අකමැති
ගතියත් උතුම් වූ - මේ මහා ලොවටත් විසාලයි.
1065. දිරිය ගෙන සැපයුන - ජලයෙන් පිසූ කැඳ වුව
සිඟා ලද කෑමට - වඩා අනගි යි එය ම යහපති.
1066. කිරි දෙනකට වතුර - යැදුමත් නීච කම මෙන්
කෑමට හිත කැමති - දැයට යැදුමන් නිචකම මැ යි.
1067. සඟවන දද දනන් - ඇසුරෙන් නො සිගනා ලෙස
සිඟා යන ඇමගෙන් - යදිමි ලෝ වැඩ පිණිස ඇමට ම.
1068. අ පරිස්සම් ඔරුව - සිඟමැ යි සනිටුහන් වූ
සැඟවුම් ගල් තලේ - හැපී සුණු විසුණු වී වැන සේ.
1069. සිඟුමට සිතන සිත - එම අනුහසින් උණු වේ.
සැඟවීමට සිතන - කල්හි උණු වූ සිතත් වැන සේ.
1070. සඟවන්නවුන් පණ - කො තැනක සැඟවෙනව දෝ
නැත යන බස අසන - යදියන්ගෙ පණ යනව වාගේ.
108. අධමතාවය
1071 හැඩයෙන් සමානයි - මිනිසුනටමත් කයවරු
නීචවූ ඔවුනට - සම කරත හැකි කෙනෙක් දැක නැත.
1072 යුතුකම් දැන උගත් - අයටත් වඩා යහපති
යුතුකම් නොදන්නා - නීචයෝ සිත දුකක් නැත්තෙන්.
1073 නීචයෝ තැනකදී - දෙවියන් අබි බැවූයේ
හිත කැමති හැම දැය - නිතර කර හැසිරෙන නිසාවෙනි.
1074 දුබලයන් දුටු තැන - සැඩ පරුෂ ගති පෙන්වා
සාඩම්බර ලෙසට - උසස් කර්ම පළ කෙරෙති කයවරු.
1075 කයවරු දඩුවමට - බියකම නිසයි සංවර
නැතොත් රුචිවූ දැය - ලැබුමටත් පෙන්වතී සංවර.
1076 අසන ලද රහසක් - පිට කරණට සමත් වෙති
ඒ නිසා කයවරු - ගහන බෙර වැනි වේය නිතරම.
1077 කම්මුල් පහර දී - රිදවන අයට මිස වෙන
කෙනෙකුට නොපෙන්වති - කෑම කෑ අත පවා කයවරු.
1078 උතුමන්ගෙන් පලක් - ලැබුමට කීම සෑහෙයි
කයවරුන් මිරිකුව - ලබත හැක පල උක්දඩුව මෙන්.
1079 අනුන් සතු කෑමෙත් - ඇඳුමෙත් කැලැල් සෙවුමට
යුහුසුලු වෙති උදක් - නීචයෝ තම නීච ගුණයෙන්.
1080 කයවරුනට කෙසේ - කවරක් කරත හැකි වෙ ද?
විපතක් පැමිණී කල - තමා වුව විකුණා ගනීවි
No comments:
Post a Comment