tel09

Thirukkural in Telugu తిరుక్కురళ్ (Translator: గురుచరణ్)

81. చనువు
0801	చనువనంగఁ జెల్లు సహాయించి యేదైన స్వీకరించునట్టి స్నేహితంబు.
0802	స్నేహమునకు గుర్తు చెప్పకజేయటే నొప్పుకొనుటె దాని గొప్పదనము.
0803	చెలిమి చాల నాళ్ళు చేసిన ఫలమేమి చనువె లేకయున్న సలువ నొకటె.
0804	బాధ్యత గలద్దంచు పాటించి చెప్పక చేయు వనిని చనువె స్వీకరించు.
0805	తెలియని తనమనుచుఁ జెలిమితో పలికిన హితుని తప్పు నోర్వ హితమంటుండ్రు.
0806	చనువు వలన గొప్ప సంకటమేరాగ వదలుకొనడు మిత్ర వరుఁడు దాని.
0807	మిత్రయందు ప్రేమ సూత్రమ్ము తెగరాదు హితుని వలన బ్రతుకె హీనమైన
0808	వినక నెవరు జెప్ప విశ్వసించెడు మిత్రు ద్రోహపరచు దినమె దుర్దినమ్ము.
0809	కాల కాలముగను గలసిన స్నేహమ్ము విడని వాని బొగడు విశ్వమెల్ల.
0810	ఎన్నిజేయ స్నేహ మెడబాటు గానట్టి మిత్రులఁ బగవారు మెచ్చుకొంద్రు.
82. దుర్జనమైత్రి
0811	కరిగి ద్రాగినట్లు కనిసించు ఖలుమైత్రి తరిగినంత మేలు వెరుగనీక.
0812	కలిగినప్పు డుండి తొలిగిన దొలిగెడు స్నేహ మున్ననేమి చెడిన నేమి.
0813	సాని, దొంగవాని సరిబోలు నందురు ఫలముగోరి చెలిమి సలుపువారు.
0814	అనిని బారనట్టి యశ్వంబు సరిమైత్రి యుండు టొకటె లేకయుండు టొకటె.
0815	కష్టములను నాదఁ గానట్టి స్నేహమ్ము చెడినమేలె వృద్ధిఁ జెందకుండ.
0816	అల్ప జనులతోడి యన్యోన్యమునకన్న ప్రాజ్ఞులైనవారి పగయె మేలు.
0817	మాట మైత్రికన్న కోటికి లాభమ్ము శత్రువులుగనుండి సలుపు చెడుపు.
0818	విజయ మొసగు పనికి విఘ్నాలు గల్పించు చెలిమి వదలనగును జెప్పకుండ.
0819	మాట చేతలందు మర్మంబు గలమైత్రి కలను గూడ వచ్చి కలతబెట్టు.
0820	ముందు బొగడి వెనుక నిందించు దుర్జను చెలిమి రెప్పపాటుఁ జేయవలదు.

 

83. తగని మైత్రి
0821	పైకి చెలిమిఁజూపి పగ నెదవర్తించు చెలిమి, జెలిమిగాదు కొలిమిగాని.
0822	ఐనవారలట్టు లనిపించి వేరైన వారి చెలిమి వారవనితఁటోలు.
0823	చదివినంత రాదు సంస్కార సంపత్తి మనసు మనసుతోడ మైత్రిగాక.
0824	నవ్వు తొలకరించు నయవంచకుల మైత్రి తలఁచుకొన్న భయము గలుగు చుండు.
0825	చిత్త మత్తుకొనని చెలికాని మాటలు నిర్ణయింపరాదు నిజమటుంచు.
0826	మిత్రులవలె మేలుఁ మిగులంగ బలికినన్ వంచకంబు బయట పడున దెట్లొ.
0827	వినకు కాని వాని వినయంపు మాటలు విల్లు వంగినట్టి విధముగాన.
0828	దండమన్న చేతి దాపున క్రూరస్త్ర మణఁచగలడు శత్రువైనవాడు.
0829	కాని వాని యెడల కలసినట్లుండియే తొలిగిపోవఁ మెఱుగు తొందఱగను.
0830	మోసగానితోడ మురిపించునట్టులే తెంపుకొనుట చెలిమి కింపటండ్రు.

 

84. అనివేకము
0831	తెలివి హీనముందు దెలిపెడిదేమన్న చెడువునంటె మంచి విడచుటగును.
0832	హీనమందు గొప్ప హీనమ్ము సర్వదా చెడు ప్రవర్తనమ్ము విడువకుంట.
0833	సిగ్గులేమి, లక్ష్య సిద్ధిలేమి, మూర్ఖమ్ము మూడు కూడియుండు మూర్ఖునందు.
0834	చదివి చెప్పగల్లి, నది చేయకున్నచో వాని కన్న బుద్ధి హీనుడెవడు?
0835	ఏడు జన్మములకు నెడ్డండు నరకమ్ము నొక్క జన్మలోనె చిక్కబట్టు.
0836	నీతి బాహ్యాఁడగుచు నిర్వహించిన కర్మ చెడును లేనియెడల శిక్ష మిగులు.
0837	ఇతరు లనుభవింప వెతలంద్రు స్వజనులు తెలివిహీనుడున్న కలిమి మిగిలి.
0838	వెట్టి కల్లు ద్రాగు విధమగు నవివేకి హస్తమందు లక్ష్మి యమరునేని.
0839	బుద్ధిహీను మైత్రి తద్దయు సుఖమిచ్చు తొలఁగునపుడు బాధ కలుగరామి.
0840	మట్టికాళ్ళఁ బరుపు మంచ మెక్కిన రీతి బుద్ధిహీనుడేగ బుధుల సభకు.
85. అవగుణము
0841	లెక్కుకెక్కదేది లేకున్నఁ జెప్పగా లెక్కకెక్క బుద్ధి లేకయున్న.
0842	హీను డీయ డేది యిచ్చినన్ నద్దాని పుచ్చుకొన్నవాని పూర్వకృతము.
0843	కుమతి తనకు దానె కుమిలిపోయెడు బాధ శత్రువులకు బెట్ట సాధ్యపడదు.
0844	మౌఢ్యమన్న దొకటి మహిమీద నున్నచో నన్ని దనకె దెలియునన్న మదమె.
0845	చదివినట్లు జెప్ప చదవకఁ జదివిన చదువులందు బుట్టు శంకలెన్నొ.
0846	తప్పుగప్పు కొనకఁ దనువునే గప్పును గుణము లేనివాఁడు గొప్పగాను.
0847	మర్మమెడలఁ జేయు మతిహీనుడగువాఁడు తనకుఁదానె కీడు ననుభవించు.
0848	వినమి జెప్పినట్లు తనకైన దెలియమి చచ్చుదనుక వెంట వచ్చునొప్పి.
0849	బుద్ధిహీను దెవడు బుధులమాట వినడు తనదు మార్గమందె తాను పోవు.
0850	లోకులున్న దన్న లోకోక్తికాదన్న వాని దయ్యమనుచు వసుధ బిలచు.
86. కలహము
0851	కలసి మెలసి యుండు చెలిమిని బాధించు రుగ్మత కలహంపు రూపమగును.
0852	చెలిమి లేకయున్న చెడువుగాదొకనికి కలహమాడరాదు కలుసుకొన్న.
0853	బాధలందు మిగుల బాధించు కలహమ్ము విడచి నంత దాని వెలయు కీర్తి.
0854	కష్టములకు నెల్ల కలహమ్ము మూలమ్ము దాని వెడువ సుఖము తానె వచ్చు.
0855	కలహములకు దిగకఁ దొలగి పోయెడువాని గెలువ దలచువారు గలరె జూడ.
0856	కలహ జీవనమ్ము గలవాఁడు బ్రతుకున బాగుపడుటకన్ను నోగుపడును.
0857	కలహమందె కన్ను గలవార లెప్పుడు నీతి మార్గమందు నిజము గనరు.
0858	పగకు దూరమైన ప్రాప్తించు సంపద లంట దాని చెడుగు లావహంచు.
0859	కలహ దూరమైన కలదు భ్రదత దాని వెంచుకొన్న చెడుపు ముంచుకొనును.
0860	కలహ వర్తనమున కలుగును కష్టాలు నీతి పథమునందు నిధులు దక్కు.
87. శత్రుశక్తి
0861	అధికులందు కలహమాడుట దోషమ్ము ఆడకున్న దోష మల్పులందు
0862	సానుభూతి, మైత్రి స్వబలమ్ము లేనట్టి వాని శత్రువెట్లు వదలిపెట్టు
0863	దానహీను, బుద్ధిహీను నిర్ధాక్షిణ్య గెలువ సులభ మెట్టి బలములేక.
0864	విడువఁడాగ్రహమ్ము విడచు నిదానమ్ము నట్టినాఁడు లోకు వందఱికిని.
0865	నీతియు నియమమ్ము నిత్య కర్మములేని నిందపరుని గెల్వ వందమంది.
0866	కన్నుఁగాననట్టి కామమ్ము కోపమ్ము నున్నవాని గెల్చు టుత్సవంబు.
0867	ఇచ్చియైన కలహమేర్పడ జూడుము దగ్గరుండి గుంట ద్రవ్వువాని.
0868	దుర్గుణంబుతోడ దుశ్చేష్ట లలవడ్డ రోతురెల్ల శత్రు ప్రీతినాఁడు.
0869	సమరమునకు తృప్తి, సాధ్యత సబ్దుద్ధి లేనివాడు శత్రువైన యెడుల.
0870	శాస్త్ర హీనుతోడ శతృత్వమందని వాని నెట్టి కీర్తివలచిరాదు.

88. విరోధనిరోధము
0871	వైరమనెడు దుష్టవర్తన పరిహాస మునకునైన వెట్టుకొనఁగ రాదు.
0872	కలహ మాడవచ్చు విలుకానితో నైన వలుకులాడువాని పగను వలదు.
0873	తనకు బలము లేకఁ దనవారు లేకుండ కలహమునకు దిగినఁ గలదె బుద్ధి.
0874	పగతునైన నెయ్యముగ జేసుకొనువాని ముంచిలోనె జగతి మహిమ వెలుగు.
0875	తోడులేదు జూడఁ, జోడైన బలవాళ్ళు వాళ్ళనొకని స్నేహ వర్తికమ్ము.
0876	కలసి ముందు వెనక కలహమాడుట కన్న కలసి కలియనట్లు మెలఁగుటొప్పు.
0877	అరయలేని వాని కగచాట్లు జెప్పకు బలముఁ జెప్పబోకు బగతునెడను.
0878	తలచుకొన్న పనికి వలసిన సామగ్రి జేర్చుకొన్నవానిఁ జెరుపతరమె.
0879	ముండ్లచెట్లు నెల్ల మొలకలో గిల్లక ముదిరినంత గదప నొదవుబాధ.
0880	శత్రువులను నణచ శక్తిజాలని వాఁడు స్వేచ్ఛగాను శ్వాస పీల్చలేడు.

89.  లోపగ
0881	నీడ, నీళ్ళ గుణము వాడంగ దెలియును ముందు దెలియదట్లె బంధు పగయు.
0882	కత్తినెత్తు పగకు నొత్తిలఁ బనిలేదు భయపడంగ వలయు బంధు పగకు
0883	ఐనవారి వైరమగుపించకనె చంపు కుమ్మరి చెయినుండు కూసు విధము.
0884	అంతరంగ కలహ మారంభమైనచో చుట్టరికమె నిన్నుఁ బట్టియిచ్చు.
0885	చూడ చుట్టమయ్యు కీడెంచువాఁడున్న వాని వలన వచ్చు ప్రాణహాని.
0886	ఐక్యపడిన వారికైనచో కలహమ్ము తప్పుకొనఁగలేము ముప్పురాక.
0887	కలిసినట్లె యుండు కలశమ్మువైమూత ఇంటి పగయునట్లె యిమిడియుండు.
0888	ఆకురాయి యినుము నరగదీనెడి మాడ్కి పాడుబడును గృహము బంధుపగళు.
0889	అంతరంగ కలహ మణు మాత్రమున్నను దాని ముప్పు గొప్పగాను తోచు.
0890	సర్పమున్న యింటఁ సంసారమున్నట్లు సమరసమ్ము లేక సాగు బ్రతుకు.

90. పెద్దల నవమదించమి
0891	నిందఁ జేయకున్న నియతాత్ములను జూచి క్షేమ మంతకన్నఁ జెప్పలేము.
0892	ఆర్యులైన వారి కవమాన మొనరింప వారి వలన తగని బాధ్యలబ్బు.
0893	చెడగనున్న, నేది నడుగకు పెద్దలఁ జావుఁగోర కీడు సలుపఁజాలు.
0894	ఆర్యులైన వారి కవమాన మొనరింప తట్టి లేపినట్టు దండధరుని.
0895	తప్పి బ్రతుకలేడు ధరణిలో నెచ్చోట శిక్ష జనుల మనసు కష్టపడిన.
0896	బ్రతుకవచ్చు నగ్ని బడియైన, పెద్దల నవమదించి బ్రతుక నలవికాదు.
0897	ఇంద్ర భోగమైన నేమౌను శిష్ఠుల మనసు కష్టపడిన మరుక్షణమ్ము.
0898	అచలులైన వారి నవమదించిన వారి యాస్తినాస్తి వంశ మంతరించు.
0899	బ్రహ్మ చింతనుండు ప్రాజ్ఞులు కోపింప రాజు జోగి యగును రాజ్యమెడలి.
0900	చివుకుమనినఁ జాలు సిద్ధుల హృదయము లంగరక్ష లెవ్వి యాదుకొనవు.