tel01

Thirukkural in Telugu తిరుక్కురళ్ (Translator: గురుచరణ్)

I. ధర్మ కాండము

1. దైవ ప్రార్థన
0001	అచ్చుమూలమైన దక్షరంబుల కెల్ల వేద వేద్యు డాది విశ్వమునకు
0002	చదివినన్దుకేమి సఫలమ్ము సర్వజ్ఞు చరణములకు బూజ సలుపకున్న
0003	సుమన గమను పాద కమలమ్ములకు సేవఁ జేయువారి బ్రతుకు క్షేమ మిలను
0004	వలయు వద్దులేని వాని పాదము లంద శాశ్వతముగ దొలగు సంకటములు
0005	బంధ ముక్తుడగును ద్వంద్వ కర్మలనుండి విశ్వమయుని కీర్తి వినుతిజేయ
0006	ఇంద్రియమ్ము లణచి యింద్రియాతీతుని సత్య మార్గమరయ నిత్యసుఖము
0007	నిరుపమాను దివ్య చరణ సేవలు దప్ప మనసు శాంతి బొందు మార్గమరుదు
0008	ధర్మవార్ధియైన దైవమ్ము పద సేవఁ గర్మవార్ధి దాట గలుగు నావ
0009	చేష్ట లుడిగినట్టి చెవి కన్ను ముక్కటు లష్టగుణుని మ్రొక్కనట్టి శిరము
0010	భవ మహా సముద్ర మవలీల యభవుని పాద మందుకొన్న వారికెల్ల
2. వర్షమహిమ
0011	వాన గురియుచుండ వర్ధిల్లు లోకంబు లందుచేత దాని నమృత మండ్రు
0012	వాన కలుగఁజేయు ప్రాణి కోటికినెల్ల కూడు నీళ్ళు రెండు కొఱఁత లేక
0013	ఆకలి దహియించు, లేకున్నఁ వర్ష మ్ము జలధి దిరిగియున్న జగతినైన
0014	మడకబట్టి దున్న మరతురు రైతాంగ మదను లోన వర్ష మల్ప మైన
0015	పాడు జేయు పాడు పడినట్టి వారిని బాగుజేయు నదియు వానయగును
0016	వాన తొలకరింపఁ మానినచో పఛ్ఛి గఱికయుఁ దలఁజూపఁ వెఱచుఁనేల
0017	ఎత్తుకొన్న నీటి నివ్వనిచోఁ మబ్బు మేటి సంద్రమైన లోటుఁ బడును
0018	దేవ పూజలేదు దినకృత్యములు లేవు వాన గురియకున్న వసుధపైన
0019	తపముఁ  జెడును దాన ధర్మంబు లుడుగును నీరు జారకున్నఁ  నింగి నుండి
0020	నీరు లేకఁ జగతి నిలువగా దేరికి నూర దూట వాన లుండకున్న
3. ముక్తులు
0021	తనదు ధర్మపథముఁ దప్పని ముక్తులఁ బ్రస్తుతించు నెల్ల పుస్తకములు
0022	యతుల మహిమ లెన్న మృతులైన వారల నెంచి చెప్ప సాహసించినట్లు
0023	కల్ల నిజములం గనుఁగొని సన్యసించిన మునుల కీర్తి లోకమునకు వెలుఁగు
0024	చిత్త మంకుశముగఁ జేసి యైదింటిని నణఁచు నతఁడు మోక్షమునకు విత్తు
0025	నిగ్రహిఁచుకొన్న నిష్ఠ గరిష్ఠుని కమర ప్రభువె సాక్షి యంబరమున
0026	చేయ దగ్గ పనులె చేతురు పెద్దలు చిన్నలట్టిపనులు చేయఁలేరు
0027	వినుట కనుట వంటి వివరమ్ము లైదింటి నెఱుఁగు జ్ఞాని లోక మెఱిగి యుండు
0028	ఋషులు జెప్పినట్టి విషయమ్ములేనాఁడు మంత్రములుగ నేడు మహిమఁగాంచు
0029	గుణము లనెడు కొండ గూర్చున్న వారికి విలువ దాగ్రహంబు నిముసమైన
0030	కరుణ జూపువారె కష్టపెట్టకొకరి బ్రాహ్మణులుగ జెప్పఁబడెడువారు
4. ధర్మోద్ఘాటన
0031	ధనమునిచ్చు మోక్ష ధనము నిచ్చును ధర్మ మంతకన్న వలసినట్టి దేది?
0032	ధర్మనిష్ఠ కన్నఁదగు మంచి లేదొండు వీడ దాని కన్నఁ గీడు లేదు.
0033	చేయఁదగిన విధులఁ జేయుటే ధర్మంబు ధర్మమెడలి బ్రతుకఁ దగవు గాదు.
0034	ఆత్మశుద్ధి కన్న నన్యధర్మము లేదు మెప్పు కోసముండు మిగత వన్ని.
0035	ఈర్ష్య , యాశ , కోప మెడలుట తోఁబాటు ప్రల్లదములు లేమి పాడి యౌను.
0036	ధర్మమొకటె వచ్చుఁదాఁ జనునప్పుడు నేడు నాఁడు లెక్కఁ జూడఁదగదు.
0037	పల్లకి నొకఁడెత్త పైనుండు నొక్కఁడు ధర్మ మింతె యనుచుఁ దలచరాదు.
0038	ఉన్ననాళ్ళు మరువకున్నచో ధర్మంబు భవము నడ్డగించు బండ యదియె.
0039	ధర్మమందె సుఖము తక్కిన దంతయు సుఖముగాదు కీర్తి శూన్యమగును.
0040	ఆచరింప వలసినట్టి దగును ధర్మ మాచరింప రాని దగును నింద.
5.  గృహమేధి
0041	కాపురస్తుడన్నఁ  గాపాడగలవాఁడు ముఖ్యమతని నమ్మి మువ్వురుండ్రు
0042	సాదు, పేద, దీను లాదిగ మువ్వుర కండగాను గేస్తు డుండు నెపుడు.
0043	పితరు, దైవ మతిధి పేదలు తానైదు ధర్మములను గేస్తు తప్పకుండు.
0044	నింద బడక నున్న దందఱికిని బెట్టి కుడుచు నతని గృహము కొఱతఁ వడదు.
0045	నిర్మల మగుప్రేమ నీతియు నియమము లున్న కాపురమ్ము వన్నె కెక్కు.
0046	నీతితోడ నిల్లు నిలబెట్టు కొన్నచో నన్ని వ్రతములందె యణిఁగి యుండు.
0047	క్రమము దప్ప నట్టి కాపురస్తుఁడు మేటి ఘోర తపము జేయువారి కన్న.
0048	యుక్తరీతి ధర్మయుక్తుడౌ గృహమేధి యజ్ఞ యాగ ఫలము లనుభవించు.
0049	ధర్మ మనఁగఁ జెల్లు దాంపత్య భావమ్మె మాట బడమి దాని మంచి గుణము.
0050	బ్రతుక వలసినట్లు బ్రతికినచో నింట మింట సురలు బిలచి మెత్తురతని.
6.  ఇల్లాలు
0051	తగిన గుణము లుండి తన భర్త చేతిని మిగులఁ బెట్టఁగలుగు మగువె భార్య.
0052	పత్ని గుణము లేక ప్రఖ్యాతి ఇతరత్ర నెంత యున్నఁదన కదేమి ఫలము.
0053	లేని దేది? భార్య జ్ఞానమ్ము గలదైన! ఉన్నదేది? గుణము సున్నయైన!
0054	స్త్రీ ల కన్నఁ గొప్పఁ జెప్ప నేమున్నది చూపు మానమందు మోపిరేని
0055	పతిని దైవముగను వ్రతమున్న యిల్లాలు కురియు మన్న క్షణమె కురియు వాన
0056	తనదు గౌరవమ్ము తన భర్త గౌరవ మరసి కాచుకొన్న యామె భార్య ,
0057	కంచ నాటి స్త్రీలఁ గనిపెట్ట గా లేము మాన మందు వారి మనసులేమి .
0058	ధవుని సేవయందు ధర్మంబు దప్పని సాధ్వి కమర లోక సౌఖ్యమబ్బు
0059	పరువుఁ గాచునట్టి పత్నియే లేకున్న నడగ ఠీవిరాదు నలువురందు.
0060	సాధ్వికిఁ దగినట్టి సంతాన మబ్బిన మంగళముగ గృహము మహిమ గాంచు .
7.  బిడ్డలు
0061	తెలియలేము మంచి తెలివైన బిడ్డలు కలుగు దానికన్నఁ గలిమి వేరు.
0062	ఏడు జన్మములకు నేదోష మంటదు. ఏహ్యపడని బిడ్డ లింటనున్న.
0063	తన ధనమ్మ టండ్రు, తన సంతతినె బుధులు వారి వారి కర్మ వారి సుతులు ,
0064	కన్నబిడ్డ తనదు చిన్నారి చేతులఁ దులుపు కూడె యమృత తుల్యమగును.
0065	తనువు పులకరించు తాకినఁ దన బిడ్డ మాటవిన్న చెవుల మధుర మగును.
0066	వారి వారి బిడ్డ గారాబు మాటలు విన్న వినరు వీణ వేణురవళి .
0067	బుధుల సభల యందు పొగడొందునట్లుగ తనయుఁదీర్చు టగును తండ్రి ఋణము.
0068	తనదు సుతుని ప్రతిభ తా మెచ్చుటకు ముందె యుర్వి జనులు మెత్తు రుత్సవముల
0069	కన్న నాటికన్న మిన్నగా నుప్పొంగు తనయుని పొగడంగ వినిన తల్లి
0070	ఎట్టి తపముఁజేయ నిటువంటి పుత్రుండు పుట్టె ననిన దీరు పుత్రు ఋణము.

8.  ప్రేమ
0071	తలుపు తాళమేది నిలుపంగ ప్రేమను భాష్ప రూప మగుచుఁ బయలు వెడలు.
0072	దయఁద్రలంచు నతఁడు తమవెల్ల వెచ్చించు నదయు డన్ని తనకె యనుచు దలఁచు.
0073	జీని కిటుల దనువు గావలె నిలువంగ బ్రతుక వలయునన్న వలయు ప్రేమ.
0074	ప్రేమ యధికమైనఁ బెరవారు దమవారె న్నేహమునకు నదియె బిహ్నమగును.
0075	అతని బ్రతుకుఁ జూడ నానంద మయమన్న ఖ్యాతికెల్లఁ బ్రేమ కారణమ్ము.
0076	పుణ్యమునకెగాక పురుషత్యమునకైన వదల రాని దుగును వసుధ ప్రేమ.
0077	ప్రేమలేని వానిఁబీడించు ధర్మంబు ఎముక లేని ప్రాణి నెండ విధము.
0078	చవటి నేలఁజెట్టు చివురించనట్టుల ప్రేమలేని బ్రతుకు పేలనమ్ము.
0079	అంతరంగమందు నమరనిచో ప్రేమ బాహిరముల వలన ఫలమదేమి?
0080	జీవమునకు ప్రేమె జీవమ్ము యడిలేని నారి దేహ మస్తిపంజరంమ్ము.

9.  ఆతిథ్యము
0081	ఇల్లు గాచి ధనము నినుమడించుట యెల్ల నతిథి నాదు కొనఁగ నగును జూవె.
0082	అతిథి బయటనుంచి యమృతమే యైన దా నారగింప న్యాయ దూరమగును.
0083	ఆశ్రితాళి నెఱిగి యాతిథ్యమిచ్చిన నందుచేత లేమి నొందడెవడు.
0084	అతిథి రాక కలరి యాతిథ్యమిచ్చెడి వారి యింట లక్ష్మి వలచి నిలచు.
0085	అతిథి తినఁగ మిగులు నన్నంబు దినువాని నేల విత్తనంబు లేల జల్ల?
0086	ఒకరి నుపచరించి నొకరికి నెదురొడ్డు నతఁడు దేవతాళి కతిథి యగును.
0087	విందు యజ్ఞమగును వితరణ ఫలితమౌ యర్థరహిత మింత యంత యనుట.
0088	పెట్టలేని వారె చెట్టు పుట్టల జేరి యాశ లెడలి నట్టు లలమ టింత్రు.
0089	ఉండి యువచరింపకుండెడి దారిద్ర్య ముండు నజ్ఞులందె మెండుగాను.
0090	అనిచమనెడు పుష్ప మాప్రూణమున వాడు జూచినంత నతిథి లేచిపోవ.

10.  ఇంపుమాటలు
0091	కల్మషమ్ము లేని కమ్మని మాటలు నిజముగన్ను వారె నేర్చి యుంద్రు
0092	నగుమొగమ్ముతోడ నయముగా మాటాడ నీని కన్న దాని చేవమెండు.
0093	విధిత ధర్మమగును వినిసింప ప్రేమతో నగుమొగమ్ముతోడ నయముగాను.
0094	బాధ పరచునట్టి పేదరికము బాపు తీపిగాను జెప్ప దెలుసుకొన్న.
0095	తొడవు లేల నుడుల దొణికిన మధురమ్ము వినయ సంపదగల మనుజ తతికి.
0096	పరుల మేలెఱింగి పలికిన పలుకులు పాప మెడలజేసి చూపు నిరతి.
0097	పలుకు లందు మేలు కలుగంగ నయ్యది గుణము దప్పకున్న గురుతరమ్ము.
0098	ఎదిరి కదురులేని యింపైన మాటలే యిహాపరాల రెంట నిచ్చు సుఖము.
0099	ఇంపుగ నుడువంగ నీడేరు సకలమ్ము బండ బూతులేల బలుక వలయు?
0100	ఇంపు మాటలుండ నేలకో పరుషొ క్తి పండువదలి కాయఁ బట్టినట్లు.